18 Xan A Empresa Familiar fomenta o emprendemento desde a escola
18 de xaneiro de 2021. A Asociación Galega da Empresa Familiar (Agef) lanza hoxe xunto con Afundación, Obra social Abanca, a primeira edición de Empresa Familiar nas aulas, un programa para fomentar o emprendemento desde a escola. O alumnado de 6º curso de Educación Primaria e de 3º e 4º curso da ESO poderá conectar co mundo da empresa a través desta iniciativa que comezou este mesmo luns en dez empresas familiares que forman parte da asociación.
Representantes de Grupo Aresa (Lugo), Congalsa (A Pobra do Caramiñal), Severiano Servicio Móvil (As Pontes), Grupo Tojeiro (Betanzos), Espina y Delfín (Santiago), Babé y Cia (Vigo), Terras Gauda (O Rosal), Lodiel (Moaña-Cangas), Grupo Pérez Rumbao e Grupo Revi (Ourense) serán as compañías encargadas de trasladar a súa experiencia á fronte dunha empresa familiar aos máis de 400 estudantes participantes a través de faladoiros por videoconferencia, que se completarán cunha visita virtual ás sedes das empresas participantes.
Os docentes do IES Lucus Augusti (Lugo); CPR Manuel Peleteiro, IES Castro da Uz, IES as Mariñas e Colexio San José de Cluny (A Coruña); Colegio Maristas, CPI Manuel Suárez Marquier e Colegio Eduardo Pondal (Pontevedra); e CPR Salesianos e CEIP Mestre Vide (Ourense) terán ao seu dispor unha guía didáctica, elaborada por un equipo de expertos, con recursos relacionados coa empresa familiar e o emprendemento.
O programa completarase co primeiro concurso Imaxina a túa empresa, no que todos os alumnos e alumnas participantes deberán desenvolver un traballo explicando a creación da súa empresa ideal de calquera sector ou actividade económica, independentemente da súa viabilidade como negocio.
O obxectivo deste programa é reforzar a educación emprendedora e fomentar as vocacións nos escolares, así como potenciar os valores das empresas familiares, que representan o 92,4% do tecido empresarial de Galicia e dan emprego directo a 371.000 persoas.
