A Asociación Galega da Empresa Familiar destaca o compromiso de Grupo Servicio Móvil co desenvolvemento sustentable, a creación de emprego de calidade e a vocación de permanencia en Galicia para recoñecer á familia empresaria Castro Romero nesta décimo quinta edición. O acto de entrega contará tamén coa presenza do presidente do Instituto de Empresa Familiar, Marc Puig, e o director institucional de Sabadell Gallego, Manuel Prol. 

Servicio Móvil foi fundado en 1978 coa creación da empresa Mudanzas Severiano nas Pontes de García Rodríguez, onde a día de hoxe o grupo empresarial mantén a súa sede. Mais as orixes remóntanse anos atrás, coas actividades de torneado de madeira e venda de alimentación animal, impulsadas por Severiano Castro e os seus fillos. Na actualidade, o grupo, liderado polo presidente e conselleiro delegado José Luis Castro Romero, conta con 23 empresas dedicadas á loxística sanitaria, xestión de información, externalización de procesos de negocio, tecnoloxía, comercialización de produtos, industria e agrocomercial.

Con clientes tanto no eido privado como no público, Grupo Servicio Móvil presenta unha facturación anual de 105 millóns de euros e xera 2.920 empregos directos.

Premio Familia Empresaria

O Premio Familia Empresaria, outorgado pola Asociación Galega da Empresa Familiar co apoio de Sabadell Gallego, distingue con carácter anual dende 2005 a traxectoria empresarial e o mantemento das raíces en Galicia das empresas de propiedade familiar da comunidade. As familias Pérez Rumbao (Ourense), Pereira (Vigo) e Prada (A Coruña) foron as premiadas nas tres últimas edicións.

A Asociación Galega da Empresa Familiar está formada por 58 das empresas de propiedade familiar máis relevantes de Galicia. A súa función é fortalecer e dar continuidade ás empresas de orixe familiar da comunidade galega, que representan o 92,4% do tecido empresarial, o 86% do emprego privado e o 85% da aportación empresarial ao PIB..