24 Feb AGEF, UDC e Inditex impulsan a Cátedra de Empresa Familiar da Universidade da Coruña catro anos máis

24 de febreiro de 2025.– O venres pasado tivo lugar a firma do convenio de colaboración entre AGEF, Inditex e a Universidade da Coruña (UDC) para a renovación da Cátedra de Empresa Familiar desta institución académica, que ten como obxectivo fomentar o intercambio de coñecemento e experiencia no ámbito da docencia, investigación e transferencia vinculadas á empresa familiar.

O acordo foi subscrito polo reitor da UDC, Ricardo Cao Abad; o presidente de AGEF, José Bernardo Silveira Martín; e o secretario Xeral e do Consello de Inditex, Javier Monteoliva Díaz.

Ricardo Cao, reitor da UDC, puxo de manifesto o compromiso da Universidade coa transferencia de coñecementos á sociedade e mostrou o seu agradecemento a Inditex e AGEF. “Instrumentos como esta cátedra “son claves para conseguir que esa transferencia diríxase a resolver problemas reais do noso tecido produtivo”, sinalou.

Pola súa banda, José Bernardo Silveira resaltou o gran labor realizado pola cátedra. “Tras vinte anos de estreita colaboración” -comentou- “estamos felices de renovar, unha vez máis, o vínculo de AGEF coa Universidade da Coruña a través desta cátedra de empresa familiar, desde a que seguiremos impulsando a visibilidade das empresas familiares de Galicia e fomentando o emprendemento entre os estudantes universitarios. Quero, ademais, felicitar á profesora Berta Rivera polo seu magnífico labor na dirección da cátedra”.

Javier Monteoliva, secretario xeral do Consello de Administración de Inditex, incidiu no firme compromiso de Inditex coa educación e na súa capacidade de impulsar o desenvolvemento das empresas familiares da súa contorna.

A Cátedra, que terá unha duración inicial de 4 anos, organizará baixo o seu paraugas diversas actividades enmarcadas en catro principais liñas de actuación: a formación, a investigación, a divulgación e a colaboración institucional. Entre as iniciativas previstas están a docencia en titulacións oficiais da Facultade de Economía e Empresa, a dirección de TFG e TFM relacionados coa Cátedra, a elaboración de talleres e conferencias ou a visita a empresas familiares. En investigación, levarán a cabo traballos profundando nas liñas temáticas relacionadas, fomentando a participación en congresos e seminarios para presentar os traballos de investigación en curso.

A Cátedra Institucional da Empresa Familiar

A Cátedra Institucional da Empresa Familiar naceu no ano 2005, froito dun convenio de colaboración entre a UDC e o Instituto da Empresa Familiar, co patrocinio da antiga Caixanova, Inditex e a Asociación Galega de Empresa Familiar. Foi impulsada co obxectivo de promover a docencia, a investigación e a transferencia de coñecemento sobre as características diferenciais das empresas familiares e os diversos problemas que afectan á súa xestión e crecemento.

Pé de foto: dereita a esquerda, José Bernardo Silveira, presidente de AGEF; Ricardo Cao, reitor da UDC; y Javier Monteoliva, secretario xeral do Consello de Administración de Inditex