26 Mar Congalsa comparte nas aulas o seu legado familiar e a aposta pola innovación, sustentabilidade, sabor e conveniencia da súa oferta culinaria conxelada e refrixerada

26 de marzo de 2025.– O conselleiro delegado de Congalsa, Julio Simarro Esplá, impartiu unha charla o pasado mes de xaneiro a un grupo de 68 alumnos do Ciclo de Administración do IES Leiladoura, de Ribeira (A Coruña). Os estudantes tiveron a oportunidade de realizar unha visita posterior ás instalacións da empresa na Pobra do Caramiñal, onde degustaron algúns dos produtos máis destacados da súa oferta culinaria de conxelados e refrixerados.

Ambas as actividades, charla e visita, enmárcanse na quinta edición do programa “Empresa Familiar nas aulas”, de AGEF e Afundación, no que participan 23 empresas familiares galegas e máis de 1.000 alumnos de ESO, Bacharelato e Formación Profesional de toda Galicia.

Durante a charla no instituto coruñés, Julio Simarro explicou aos estudantes que é unha empresa familiar e por que os valores da familia, o compromiso, o legado e a cultura do esforzo son os seus piares fundamentais.

O directivo compartiu na súa intervención algúns datos relevantes para reflectir o impacto das empresas familiares na economía e a sociedade española e galega. Repasou, ademais, a evolución de Congalsa desde a súa fundación en 1990 por Luis Simarro como fabricante de precociñados a base de produtos do mar en Ribeira, ata converterse nunha compañía alimentaria internacional que comercializa unha ampla oferta de solucións culinarias conxeladas e refrixeradas, baseadas na sustentabilidade, sabor e conveniencia, en 36 países distintos.

Retos, valores e tecnoloxía punteira

En mans da segunda xeración familiar, Congalsa factura xa máis de 173 M€, cun persoal de 832 traballadores e seis fábricas en España e unha en Portugal, nas que produce unhas 33.000 toneladas de produtos ao ano.

Julio Simarro finalizou a charla expoñendo os principais retos da compañía relacionados co crecemento, a internacionalización, innovación e marca, as persoas e a continuidade xeracional, compartindo os valores da súa organización. Mencionou a integridade e ética empresarial, o compromiso coa empresa e a orientación ao cliente, pasando pola innovación, o respecto polas persoas e o medioambiente e o traballo no equipo, con atención na mellora continua, eficiencia e actitude positiva.

Detívose ademais o directivo na explicación do proxecto Congalsa 4.0, que implicou un investimento de 4,8 M€, para converter a súa planta da Pobra do Caramiñal nunha fábrica intelixente, equipada con tecnoloxías punteiras como a robótica colaborativa, Big Data, IA ou IoT.

Pé de foto: Julio Simarro Esplá, durante a charla no IES Leiladoura