20 Mar Jealsa Corporación, un exemplo de economía circular e compromiso coa contorna

20 de marzo de 2025.-Unha trintena de alumnos de 1º e 2º de Bacharelato do IES Fontexería, de Muros (A Coruña), achegouse o pasado 6 de febreiro ás instalacións de Jealsa en Boiro (A Coruña) para participar no programa educativo “Empresa familiar nas Aulas” que promoven a Asociación Galega da Empresa Familiar (AGEF) e Afundación.

Á súa chegada foron recibidos pola directora de relacións institucionais de Jealsa e directora de AGEF, Margarita Hermo, quen impartiu unha charla sobre o impacto, importancia e valores da empresa familiar na economía, sociedade e o compromiso da compañía coa contorna.

Hermo relatou aos estudantes a historia da compañía familiar, desde a súa fundación en 1958 por Jesús Alonso Fernández como fabricante e comercializadora de conservas de peixe e mariscos, ata converterse nunha corporación de 27 sociedades e tres divisións de negocio (Jealsa Alimentación, Seanergy 360 -Valorización- e Bealtaine –enerxías renovables-), froito da innovación constante, a diversificación e a sustentabilidade e economía circular.

Na actualidade, a división de alimentación de Jealsa produce uns 1.500 millóns de latas de conservas de produtos do mar ao ano, coas súas marcas principais Rianxeira (buque insignia da compañía), Escurís (con materia prima da Ría de Arousa) e internacionais (Robinson Crusoe, en Chile e Brasil, e MareAperto en Italia).

O grupo está a impulsar ademais a súa división de Valorización, na que se agrupan sociedades como Pet Select, Valora e Conresa, centradas na fabricación de alimentos para mascotas e produtos para cosmética e farmacia, a partir do aproveitamento do 100% da materia prima que entra nas súas instalacións.

Beltaine é a división que lidera a aposta polas enerxías limpas, con explotacións eólicas, paneis fotovoltaicos, coxeración etc., e que conseguiu a neutralidade de emisións nos centros de produción da corporación.

A xeración de emprego é outro dos grandes factores de crecemento de Jealsa. A innovación, o proceso de internacionalización e a consolidación do programa We Sexa (Responsabilidade Social Corporativa) supuxeron a creación constante de emprego de calidade ata reunir un persoal global próximo aos 3.500 traballadores.

Pé de foto: Visita ás instalacións de Jealsa en Boiro