23 Set Representantes de empresas asociadas visitan a plataforma loxística do Grupo Servicio Móvil en Negreira
23 de setembro de 2025.– Un grupo de representantes das empresas asociadas de AGEF realizaron esta mañá unha visita guiada á plataforma loxística do Grupo Servicio Móvil, no polígono industrial de Negreira (A Coruña). A xornada enmárcase no compromiso da Asociación Galega da Empresa Familiar por favorecer o relacionamiento entre as súas asociadas para fomentar o coñecemento mutuo dos seus modelos de negocio, a xeración de sinerxias e o impulso da competitividade das empresas familiares galegas. Desde a posta en marcha desta iniciativa, AGEF organizou visitas a máis dunha cincuentena de empresas familiares de Galicia.
A xornada comezou cunha presentación do Grupo Servicio Móvil, por parte do seu conselleiro delegado, José Luis Castro Romero, e a súa directora xeral, María Luisa Brandt. Seguidamente, os asistentes tiveron a oportunidade de percorrer a plataforma loxística sanitaria, desde a que a compañía xestiona unha media de 2.400 pedidos diarios, con destino a 913 centros sanitarios de toda Galicia.
Fundado en 1978, por parte da familia empresaria Castro Romero, o Grupo Servicio Móvil deu os seus primeiros pasos no sector loxístico coa prestación de servizos de mudanzas e traslados de mobiliario nas Pontes de García Rodríguez (A Coruña). Na década dos 90 o grupo detecta as necesidades loxísticas no sector hospitalario e empeza a realizar os primeiros servizos de custodia, xestión de historias clínicas e loxística hospitalaria, apostando pola tecnoloxía, transformación dixital e innovación.
En mans da segunda xeración familiar, Grupo Servicio Móvil integra na actualidade a unha vintena de sociedades e máis de 180 centros de traballo, nos que emprega a máis de 2.000 persoas. Conta ademais cunha empresa vinculada á fabricación de mobiliario e deseño de proxectos en madeira (Adera) e outra centrada no sector agroalimentario (Severiano Agrococomercial).
Pé de foto: visita á plataforma loxística do Grupo Servicio Móvil en Negreira
