29 de maio 2024. Susana Lourido, profesora do IES Auga da Laxe (Gondomar), acompañou aos estudantes de 2º de bacharelato na súa visita ás instalacións do Grupo Pereira. A iniciativa forma parte da 4ª edición do programa Empresa familiar nas aulas da Asociación Galega da Empresa Familiar e Afundación ABANCA Obra Social. “Desde o ámbito educativo, queremos que os estudantes comprendan que a súa formación connosco é un paso previo á súa entrada ao mercado laboral e que emprender é unha opción laboral moi interesante”, explica Lourido.

A docente considera que esta experiencia é fundamental para achegar aos alumnos ao mundo real e permitirlles observar de preto como funciona unha empresa na práctica. “Esta iniciativa permítenos mostrar o proceso produtivo dunha empresa, algo difícil de imaxinar desde unha aula” agregou Susana Lourido, destacando que a interacción directa con empresarios e profesionais proporciona coñecementos moi valiosos.

Sara Amigo, unha das alumnas que participaron na visita, destacou especialmente o bo ambiente na compañía, “a guía sempre que se cruzaba cun traballador saudábao polo seu nome e falaba co”. Pola súa banda Patricia Troncoso, valorou positivamente a actividade práctica dentro do programa. “Ver as instalacións en funcionamento foi interesante, pero sen unha charla previa explicativa, a experiencia non sería a mesma”, explica a estudante do IES Auga da Laxe.

Ambas as mozas mostraron o seu interese no emprendemento e expresaron as súas aspiracións de explorar este campo no futuro. “Apeteceríame tentalo porque é unha maneira de descubrir do que uno é capaz” afirmou Sara Amigo, interesada en crear unha empresa de accesorios de moda.

O programa Empresa familiar nas aulas non só busca achegar os estudantes ao mundo empresarial, senón tamén inspiralos a considerar o emprendemento como unha opción viable para o seu futuro. Iniciativas como esta son cruciais para preparar á próxima xeración de líderes empresariais de Galicia.

Imaxe: Ruy Andrade Pereira, responsable de Relacións Externas e Desenvolvemento de Negocio do Grupo Pereira cos alumnos do IES Auga da Laxe. FOTO: Punto GA | M.Riopa