09 de febreiro 2024. “A capacidade das empresas para adaptarse aos cambios é fundamental para a súa supervivencia a longo prazo”, afirma Yago González-Babé, responsable de Desenvolvemento de Negocio de Babé e Cia. Unha habilidade que demostraron dominar ao longo das súas máis de cento trinta e cinco anos de existencia da compañía. “Un claro exemplo é o momento actual, a descarbonización e a aparición de novas fontes de enerxía requiren unha adaptación necesaria por parte da empresa”, explica o directivo.

A compañía abriu as súas portas aos estudantes de 4º de ESO do colexio Maristas de Vigo, como parte do programa Empresa familiar nas aulas de Afundación Obra Social ABANCA e a Asociación Galega da Empresa Familiar. A visita brindou aos máis novos unha perspectiva única sobre o papel vital que desempeñan as empresas familiares e os seus empresarios en Galicia.

Os alumnos foron guiados por Cristina González-Babé, directora xeral da compañía, a través dun percorrido polas instalacións, onde puideron interactuar cos diferentes departamentos e coñecer de preto as operacións diarias da compañía. Para finalizar o percorrido, os mozos tiveron a oportunidade de subirse a un dos camións e recibir unha charla técnica sobre descargas de cisternas por parte do conselleiro de seguridade da empresa.

A visita non só proporcionou aos estudantes unha ampla visión da loxística e o transporte de combustibles, senón que tamén lles permitiu comprender a relevancia histórica de Babé e Cia. Fundada en Guixar (Vigo) en 1888, a compañía converteuse nunha das principais empresas transportistas de produtos petroleiros do noroeste da península.

A Asociación Galega da Empresa Familiar está integrada por 60 das principais empresas de propiedade familiar, que facturan 13.000 millóns de euros e empregan a 58.000 profesionais. A cuarta edición do programa volve este ano con 18 das empresas familiares máis destacadas de Galicia, e máis de 750 alumnos de toda Galicia.

Imaxe: Yago González-Babé responsable de Desenvolvemento de Negocio, xunto cos estudantes de 4º ESO do colexio Maristas de Vigo.